Overblog Suivre ce blog
Editer l'article Administration Créer mon blog
Partit Occitan - Pais Tolosan - Actualitats - Blog - News

Actualitats dèu Partit Occitan dèu Pais Tolosa. Actualités du Partit Occitan du Pais Tolosan

Murèth 1213 - 2013

Publié le 6 Septembre 2013 par Partit Occitan Pais Tolosan

Murèth 1213 - 2013

Chunta Aragonesista, Iniciativa per Catalunya Verds, Europe Ecologie-Les Verts Midi-Pyrénées, Partit Occitan

Tornar inventar la solidaritat occitana, catalana e aragonesa

Per lo 800° aniversari de la batalha de Murèth, temps ont las Pirenèus nos recampavan, vos convidam per un acte comun a Murèth lo dissabte 14 de setembre a 16h, sala clément ADER. Aquel acte deu estre un signal politic euroregional fòrt per totas e tots.

La batalha de Murèth 1213

Ongan, en 2013 es lo 800en aniversari de la batalha de Murèth, qu’opausèt, lo 12 de seteme de 1213, los crosats francés menats per Simon de Montfort, a la coalicion occitano-catalano-aragonesa del rei Peire II d’Aragon e de Raimon IV, comte de Tolosa.

Aquela batalha de Murèth foguèt un cambiament important dins la guèrra violenta, de destruccion menada pels barons del Nòrd, e desirada pel Papa Innocent III. Al començament, aquela guèrra èra contra lo catarisme, contra la diversitat dels cultes. Aquela novèla religion crestiana s’èra desvelopada dins una societat del « Paratge », del respècte, que sos fondaments s’opausan a l’intolerable inquisicion qu’impausarà la terror pendent quasi un sègle. La religion serviguèt evidentament de pretèxte a una conquista territoriala, causa que retrenís al jorn de uèi amb una estranha actualitat.

La batalha de Murèth, es una de las occasions mancadas per la naissença d'un espaci politic, d’una mena d’Estat entre Aragon, Catalona e una bona partida d'Occitània, de la region tolosenca duscas a Provença. Aquel territori aviá la logica d'una proximitat lingüistica, d’escambis economics et culturals, escambis que s'arrestèron pas pels sègles passats.

Qual sens donar a Murèth 2013, 800 ans après ?

Los movements de l'ecologia politica, dels autonomistas e regionalistas, dels aparaires de las culturas minorizadas, utilizan aquela commemoracion per rapelar de ont venon las culturas nòstras. Aquela commemoracion istorica e politica es una mesa en perspectiva amb l’avenidor que volèm bastir amassa.

La valorizacion dels moments istorics communs es un element simbolic, que participa a crear l'identitat d'un espaci pirenenc, çò que permet d’afortir los ligams entre lo Nòrd e lo Sud dels Pirenèus. S'agís de far recuolar lo mite de la « frontièra naturala » qu’existiriá entre lo Sud e lo Nòrd dels Pirenèus.

Murèth 2013 es l’occasion de tornar dire ensemble las valors politicas e culturalas que portam : preservacion e desvelopament de las culturas e de las lengas nòstras, necessitat politica de poders regionals o nacionals mai fòrts e mei pròches dels ciutadans, segon la liura decision de cada pòple; engatjament per una Euròpa qui permetrà de desvolopar las sinergias entre Occitània, Aragon, Catalonha, per-delà la frontièra estatala.

Afirmar la legitimitat de l'occitan, del catalan e de l'aragonés

La preservacion de la diversitat lingüistica e culturala dins lo monde es un enjòc màger per las annadas a venir. Las proximitats lingüisticas de las tres lengas romanicas minorizadas, a costat del francés e del castelhan, permeton de bastir una societat plurilingüa. Es una ajuda a l'intercompreneson dins l'espaci de las lengas romanicas, espaci que representa mai de 40% de la populacion europenca.

En França coma en Espanha, la situacion legala es pas favorabla a la preservacion de las lengas nòstras e a lor developament. Es una situacion que respècta pas los grands principis als quals fan sovent referéncia los nòstres Estats, que siá dins de textes europèus o pel biais de grands tractats e grandas convencions internacionalas.

La lenga occitana, es menaçada per l’abséncia de politica ambiciosa de transmission que poiriá èstre menada per l’Estat francés, e que pòt pas èstre compensada per las regions qu'an pas de budget pro important, ni de competéncias sufisentas.

La langa aragonesa es pas reconeguda a sa vertadièra valor per la communitat autonòma d'Aragon e a pas votat cap de programa seriós de politica lingüistica. Lo mesprétz de la realitat lingüistica d'Aragon e de las nòrmas internacionalas dins aquel domeni, que trobam dins la novèla lei de las lengas aragonesas, a motivat un recors devant la Cort Constitutionala espanhòla.

Enfin la lenga catalana, que sembla la mai plan considerada actualament, amb l’occitan de la Val d’Aran, patís encara la politica de recentralizacion del govèrn de l’Estat espanhòl actual, que vòl totjorn limitar la reconeissença e l'utilizacion preferenciala de la lenga catalana coma lenga pròpia en Catalonha, amb una interferéncia de l'Estat espanhòl dins l’aplicacion de las leis sul bilingüisme, e quitament lo trilingüisme al dintre de las administracions (escòlas, servicis d’Estat, etc.).

Las convencions internationalas sus la diversitat culturala impausan a cada territori, de crear un environament favorable a l'ensenhament de sas lengas pròpias e a una creacion culturala en lenga pròpia, favorabla tanben a la preséncia d’aquela lenga dins los mèdias electronics, audiovisuals e escriuts, e a son emplec dins la vida publica e sociala.

Es aquela politica que podèm partatjar e menar ensemble en tornar crear los ponts entre las nòstras culturas e las nòstras lengas.

Afortir l'Euro-region Pirenèus-Mediterranèa

Nòstre objectiu es de far nàisser una Euròpa federala dels pòbles que s’apiège sus d’Euroregions bastidas sus de territoris qu'an de culturas per partatjar. Aquetas entitats devon menar un ensemble important de politicas comunas qu’ajudaràn a far nàisser un sentiment europèu dins la populacion nòstra.

L'Euroregion Pirenèus-Mediterranèa permet de dispausar d'un espaci coërent per gerir de problematicas comunas coma l’educacion, la formacion professionala, la recèrca e l’innovacion, los ecosistèmas, las entrepresas , la gestion de la montanha, los mejans de transpòrt, l’agricultura. Tot aquelas politicas pòdon sonque foncionar pel biais de decisions coërentas presas dels dos cotats dels Pirenèus.

La crisi economica ligada a l'especulation financièra et immobilièra e a las retalhadas budgetàrias pòdon pas èstre invocadas per justificar una reduccion o l’abandon de projèctes euro-regionals. Al contrari, la cooperacion inter-regionala es una oportunitat per crear d’emplecs de qualitat e melhorar l'eficacitat de la gestion de las regions partenàrias.
Una politica pòt e deu èstre menada tanben al dintre de la Communitat de Trabalh dels Pirenèus, la CTP, nascuda en 1982. Recampa las 7 comunitats autonòmas e regions del Nòrd et del Sud dels Pirenèus e tanben l'Estat andorran. Deu aver una eficacitat mai granda dins lo domèni de la cooperacion entre los nòstres territoris.

Es per aquò que los partits d’esquèrra ecologistas e federalistas an decidit de trabalhar conjuntament per bastir un espaci politic e dispausar de lòcs de recampament e de debat, dels dos costats dels Pirenèus.

Aquel espaci servirà per trabalhar amassa a d'estrategias e de politicas publicas, per desvelopar nòstres territòris en solidaritat entre aragoneses, catalans et occitans.

Commenter cet article