Overblog Suivre ce blog
Editer l'article Administration Créer mon blog
Partit Occitan - Pais Tolosan - Actualitats - Blog - News

Actualitats dèu Partit Occitan dèu Pais Tolosa. Actualités du Partit Occitan du Pais Tolosan

La Setmana : Bové denóncia lo « stato-nacionalisme »

Publié le 14 Mai 2014 par Partit Occitan Pais Tolosan

Bové denóncia lo « stato-nacionalisme »

L’eurodeputat sortent fa campanha contra lo liberalisme e lo populisme. Dins una campanha europèa que l’abstencion es donada ganhanta, cal far pròva d’imaginacion. Los candidats que percorron las circonscripcions europèas devon multiplicar las declaracions d’amor a Euròpa e interessar los electors... i parvenon pas gaire pel moment. Paradoxalament, son mai que mai los eurosceptics qu’an las favors de l’opinion, a ne creire los darrièrs sondatges.

Se parla d’un FN en tèsta per l’escrutin del 25 de mai. Cal dire que los partits majoritaris s’investisson mòlament dins aquela campanha, çò que daissa lo camp liure a las autras formacions. Pasmens, d’unes eurofiles an l’intencion de se far ausir eles tanben. Es lo cas dels ecologistas pels quals las eleccions europèas son un escrutin mèstre. José Bové, cap de lista EELV pel sud-oèst es passat pel Bearn la setmana passada abans de s’endralhar cap a Bordèu per un meeting lo 17 de mai. Es anat al rencontre dels militants opausats al tròç d’autorota entre Pau e Auloron.

La Setmana : Bové denóncia lo « stato-nacionalisme »

A tanben pres posicion sul dossièr de la circulara prefectorala pertocant las relacions que devon entretenir las collectivitats e las escòlas associativas bascas e occitanas. Dins un tweet publicat lo 11 de mai, estima que l’Estat francés es pas en conformitat amb lo dret europèu. Apela quitament los conses a « desobesir al prefècte» se jamai fa obstruccion a la creacion o al desvolopament d’un establiment immersiu. « Una circulara a pas cap de valor juridica, çò a dit dins la matinala de Good Morning Occitània, (...) ai explicat simplament a de conses qu’es lo dret europèu que prima sul dret nacional.

Se un conse es atacat, pòt plaidejar a la cort europèa de justícia e ganharà ». Lo trabalh menat en comun amb l’eurodeputat còrse François Alfonsi, dins l’encastre de son rapòrt d’iniciativa, a permés de recapitular los tèxtes existents pertocant la proteccion de sas lengas minorizadas. A subretot permés de rapelar un simple fait. Se França postulava uèi per aderir a l’Union europèa, compte tengut de son actitud envèrs las lengas, seriá segurament remandada. « Sèm dins una vision completament stato-nacionalista, çò nos a dit José Bové, França es en desconnexion totala amb lo demai d’Euròpa ».

Amb golardisa, lo candidat soslinha que, demest los eurodeputats franceses qu’an votat contra lo rapòrt Alfonsi, i a los Le Pen « paire e filha » atal coma... Jean-Luc Mélenchon. «Al delà del drapèl nacional, de l’imne e de la lenga francesa, veson pas cap de salut » çò a apondut. Ironisa tanben sul sénher Louis Aliot, cap de lista FN pel sud-oèst que se presentava coma lo novèl « catar » quand lo sénher Bové considèra que lo val mièlhs comparar a « Simon de Montfòrt qu’ataca Besièrs ».

« Es lo retorn dels francs !!! Aqueles tipes son completament madurs ! » çò pensa lo candidat EELV. Lo cap de lista esparnha pas tanpauc lo Partit Socialista Europèu (PSE) respècte a lor actitud dins l’encastre de las negociacions entre Euròpa e Estats-Units. Concrètament, PSE coma PPE (dreta) s’endevenon per far adoptar aquel tractat transatlantic o TAFTA. Tres Conselhs regionals e tanben mantunas comunas dont la de Grenòbla (puèi qu’es tenguda per un ecologista) refusan ja de l’aplicar.

Lo sénher Bové espèra plan una mobilizacion equivalenta a la que s’es organizada contra l’Acòrd Multilateral suls Investiments (AMI) a l’epòca del govèrn Jospin, en 1998. « Çò que vesèm amb lo TAFTA es que tornam partir sul meteis acòrd que l’AMI, çò ditz, tornarem metre la pression ». Dins lo 64, un comitat de sosten a sa lista s’es creat fa un mes. Estiman qu’es un candidat qu’a d’ambicions vitalas per las nòstras regions, Euròpa e tanben la planeta. « L’Euròpa qui volem qu’ei ua Euròpa democratica, ua Euròpa de la diversitat, ua Euròpa en capacitat de méter en plaça ua navèra politica energetica, de lutar contra l’escaloriment deu climat » çò dison. Los ecologistas espèran far 10 % minimum per aquelas eleccions. En fait, espèran far jòc egal o far un escòre superior als socialistas.

Commenter cet article